Newcastle United gerði 1-1 jafntefli við Manchester City í fyrsta leik helgarinnar í ensku úrvalsdeildinni eftir að gestirnir frá Manchester leiddu í hálfleik.
Heimamenn í Newcastle jöfnuðu með marki úr vítaspyrnu í síðari hálfleik og vildu svo fá aðra vítaspyrnu skömmu síðar sem þeir fengu ekki.
Það eru misjafnar skoðanir á þessum atvikum, en Jarred Gillett dómari var fljótur að gefa Anthony Gordon vítaspyrnu eftir að hann slapp í gegn á 57. mínútu leiksins. Endursýningar sýndu að Ederson, markvörður Man City, snerti Gordon aðeins mjög lítillega, ef eitthvað, en það þykir ekki nóg til að breyta ákvörðun dómarans eftir reglubreytingar tengdar VAR kerfinu.
Mike Dean, fyrrum úrvalsdeildardómari og sérfræðingur Sky Sports í dómaramálum, viðurkenndi í beinni útsendingu hjá Sky að þessum dómi hjá Gillett hefði líklega verið snúið við á síðustu leiktíð.
Skömmu síðar féll Joelinton til jarðar eftir samskipti við Kyle Walker en Gillett dæmdi ekki neitt og ákvað VAR-herbergið ekki að skerast í leikinn þrátt fyrir það sem virtist vera nokkuð augljóst brot innan vítateigs.
Sjáðu þegar Gordon féll til jarðar
Sjáðu þegar Joelinton féll til jarðar
Athugasemdir
