Lærlingar Elísabetar Gunnarsdóttur hjá Kristianstad eru búnar að missa af sæti í Meistaradeild Evrópu á næstu leiktíð.
Kristianstad heimsótti Linköping í toppbaráttunni í dag og steinlá. Þetta var þriðja tap liðsins í röð og er Kristianstad fjórum stigum frá Meistaradeildarsæti fyrir lokaumferð deildartímabilsins.
Guðrún Arnardóttir og stöllur í Rosengård eru búnar að tryggja sér titilinn og endar Linköping í öðru sæti.
Amanda Jacobsen Andradóttir var í byrjunarliði Kristianstad í dag ásamt Delaney Baie Pridham. Delaney var tekin út í hálfleik í stöðunni 2-0 og var Amöndu skipt út á 68. mínútu, þegar staðan var orðin 4-0.
Emelía Óskarsdóttir kom inn fyrir Amöndu og urðu lokatölur 4-1. Kristianstad er með 49 stig eftir 25 umferðir.
Linköping 4 - 1 Kristianstad
Í Danmörku var Kristín Dís Árnadóttir ekki í hóp hjá Bröndby sem lagði Sundby að velli í efstu deild kvenna.
Kristín Dís hefur verið fjarverandi síðustu mánuði eftir að hún sleit krossband í leik með Bröndby í apríl.
Ólíklegt er að Kristín spili fótbolta aftur á þessu ári en hún er aðeins 23 ára gömul og kemur vonandi tvíefld aftur úr meiðslunum.
Kristín var mikilvægur byrjunarliðsmaður hjá Bröndby fyrir meiðslin og á 29 landsleiki að baki fyrir yngri lið Íslands. Hún á eftir að spila fyrir A-landsliðið en gerir sterkt tilkall til sætis í leikmannahópnum ef hún heldur áfram á sömu braut og hún var á fyrir meiðslin.
Bröndby er í öðru sæti dönsku deildarinnar, með 22 stig eftir 10 umferðir, tveimur stigum eftir toppliði Koge sem á leik til góða um helgina.
Sundby 1 - 2 Bröndby