Luke Shaw, vinstri bakvörður enska landsliðsins, segir að liðið finni fyrir auka hvatningu fyrir leikinn gegn Wales á HM á morgun.
Það er ekki bara það að England kemst áfram með því að ná í stig úr leiknum sem veitir þeim hvatningu, það er líka myndband frá 2016 sem gerir það.
Wales fagnaði mikið er Ísland vann nágranna þeirra frá Englandi í 16-liða úrslitunum á Evrópumótinu 2016. Fór myndband af því sem eldur um sinu á veraldarvefnum.
„Það er hægt að segja það," sagði Shaw er hann var spurður út í það hvort þetta veitti leikmönnum auka hvatningu fyrir leikinn á morgun. „En við erum á HM og þurfum ekki mikið meiri hvatningu en það."
„Auðvitað var þetta ekki fallega gert. Við viljum tala inn á vellinum," sagði Shaw og bætti við að enska liðið myndi ekki fagna á svona hátt. „Við berum virðingu fyrir andstæðingnum og viljum gera hlutina rétt."
Sjá einnig:
Segist hafa verið að fagna árangri Íslands - „Barnalegir hálfvitar"
Athugasemdir
