Hörður Björgvin Magnússon fer ekki til Rostov
Hörður Björgvin Magnússon, landsliðsmaður Íslands, er ekki á leið til rússneska félagsins Rostov eins og stóð til. Hann skrifaði undir lánssamning við félagið í kvöld en pappírarnir skiluðu sér þó ekki í tæka tíð.
Hörður, sem er 24 ára gamall varnarmaður, gekk til liðs við Bristol City á síðasta ári frá Juventus en hefur þurft að sætta sig við mikla bekkjarsetu frá því í janúar á þessu ári.
Leikmaðurinn hefur aðeins spilað tvo leiki það sem af er þessu tímabili en báðir komu í enska deildabikarnum.
Rússneska félagið Rostov lagði fram lánstilboð í Hörð í dag en félagið var reiðubúið að greiða 2 milljónir punda fyrir.
Hann skrifaði undir lánssamninginn rétt fyrir lok gluggans í Rússlandi en hann lokaði klukkan 21:00. Hann skilaði öllum pappírunum fyrir lok gluggans en Bristol var ekki klárt á faxtækinu og var ekki búið að senda sína pappíra til Rússlands. Því var þetta flautað af.
Hörður er þessa stundina staddur í Finnlandi þar sem hann undirbýr sig ásamt íslenska landsliðshópnum fyrir leikinn gegn Finnlandi á laugardag.
Sverrir Ingi Ingason, sem er einnig í landsliðshópnum, samdi við Rostov fyrr í sumar.
Athugasemdir
