Karólína Lea Vilhjálmsdóttir.
Það myndaðist mikil umræða um það í kringum leik Íslands og Belgíu að Karólína Lea Vilhjálmsdóttir þyrfti að vera inn á miðsvæðinu hjá íslenska landsliðinu.
Dagný Brynjarsdóttir, Gunnhildur Yrsa Jónsdóttir og Sara Björk Gunnarsdóttir byrjuðu saman á miðjunni gegn Belgíu.
Mikið var rætt um það á samskiptamiðlum að það þyrfti að hafa einhverja sem er betri á boltanum inn á miðjunni - leikmann eins og Karólínu. Að hafa hana frekar á miðsvæðinu en á kantinum því þar myndi hún nýtast betur.
Þorsteinn var spurður út í þessa umræðu á fréttamannafundi í Manchester í dag. Hann er ánægður með það sem hann er að fá frá Karólínu á kantinum.
„Ég held að mörg ykkar hafi valið Karólínu sem mann leiksins. Það svarar bara spurningunni," sagði Steini.
Karólína hefur nokkuð spilað á miðsvæðinu í fjarveru Söru, en núna er fyrirliðinn mætt aftur. Karólína er því að spila á kantinum og það verkefni leysti hún gríðarlega vel gegn Belgíu eftir að hafa átt í smávegis erfiðleikum með það í æfingaleiknum þar á undan.
Þorsteinn virðist ánægður með þessa miðju og þessa liðsuppstillingu því hann hefur stillt upp sama liðinu í undanförnum tveimur leikjum. Við spáum því að hann geri slíkt hið sama á morgun.
Athugasemdir
