Unai Emery var kátur eftir þægilegan 0-3 sigur Aston Villa gegn Preston North End í 8-liða úrslitum enska bikarsins.
Staðan var markalaus í leikhlé en lærisveinar Emery skiptu um gír í síðari hálfleik, með Marcus Rashford fremstan í flokki. Rashford skoraði tvennu á fimm mínútna kafla í síðari hálfleik og var engin leið til baka fyrir Preston.
„Marcus hefur verið frábær síðan hann kom hingað, hann er búinn að vera mjög snöggur að aðlagast og leggur mikið á sig á hverri einustu æfingu," sagði Emery eftir sigurinn.
„Þetta er skref í rétta átt fyrir hann en hann er ekki ennþá að spila upp á sitt besta. Hann er að skora mörk og sjálfstraustið er að batna. Það er mikilvægt."
Þetta voru fyrstu mörk Rashford frá komu sinni til Aston Villa en hann var búinn að eiga fjórar stoðsendingar í níu leikjum með Villa fyrir leikinn í dag.
Athugasemdir
