Borussia Dortmund lagði nýliða St. Pauli að velli, 2-1, í 7. umferð þýsku deildarinnar í kvöld.

Ramy Bensebaini var allt í öllu hjá Dortmund í fyrri hálfleiknum. Hann kom í veg fyrir mark með laglegri tæklingu á 15. mínútu og kom síðan heimamönnum í forystu þegar lítið var eftir af hálfleiknum með frábærum skalla eftir fyrirgjöf Pascal Gross.

Sænski leikmaðurinn Eric Smith skoraði eitt flottasta mark deildarinnar á tímabilinu er hann þrumaði honum fyrir utan teig, efst upp í vinstra hornið og jafnaði leikinn fyrir gestina.

Fimm mínútum síðar kom sigurmark Dortmund. Jamie Gittens, sem kom inn á sem varamaður í hálfleik, tók sprett vinstra megin í teiginn, lyfti boltanum á fjær á Serhou Guirassy sem stangaði honum í netið.

Naumur sigur hjá Dortmund sem er komið upp í 4. sæti deildarinnar með 13 stig en St. Pauli í 16. sæti með 4 stig.