Evangelos Marinakis, eigandi Nottingham Forest á Englandi, hefur verið dæmdur í fimm leikja bann fyrir hegðun sína eftir leik liðsins gegn Fulham í lok september.
Hinn umdeildi Marinakis lét öllum illum látum í göngunum á City Ground eftir leik.
Hann var ósáttur við að dómarateymið hafi ekki gefið liðinu tvær vítaspyrnur á meðan Fulham fékk eina vítaspyrnu sem Raul Jimenez skoraði úr.
Enska fótboltasambandið hefur því dæmt Marinakis í fimm leikja bann fyrir „óviðeigandi hegðun“.
Marinakis neitaði sök í málinu en reglugerðarnefnd deildarinnar fann hann sekan um að hafa brotið reglur með óviðeigandi hegðun sinni og hann því kominn í bann.
Nuno Espirito Santo, stjóri Forest, var í dag dæmdur í þriggja leikja bann fyrir mótmæli sín í 2-2 jafnteflinu gegn Brighton fyrir landsleikjatörnina.
Athugasemdir