Real Valladolid vann langþráðan sigur í La Liga á Spáni í kvöld er liðið lagði Deportivo Alaves að velli, 3-2, á Mendizorrotza-leikvanginum.

Valladolid hafði aðeins unnið einn deildarleik en það kom í fyrstu umferðinni.

Ekki fór það vel af stað en Toni Martinez, sóknarmaður Alaves, kom heimamönnum í 1-0 á 6. mínútu. Gestirnir jöfnuðu metin úr vítaspyrnu á 17. mínútu.

Valladolid fékk aðra vítaspyrnu á 72. mínútu sem Selim Amallah skoraði úr og bætti Anuar við þriðja markinu fjórum mínútum síðar.

Uppbótartímann var viðburðaríkur fyrir Kike Garcia sem minnkaði muninn í 3-2 áður en hann var rekinn af velli fyrir að fá tvö gul spjöld á tveimur sekúndum. Hann fékk fyrra gula fyrir brot í teig Valladolid og síðara fyrir að hreyta fúkyrðum í átt að dómaranum.

Lokatölur 3-2 fyrir Valladolid sem er með 8 stig í 18. sæti en Alaves í 14. sæti með 10 stig.