Lestu um leikinn: LASK 0 -  0 Víkingur R.

LASK á ekki möguleika á að komast áfram . Liðið hefur tapað þremur og gert tvö jafntefli.

Sjálfstraustið í hópnum er ekki mikið en liðið hefur alls ekki staðið undir væntingum, hvorki í deildinni heima (þar sem liðið er í sjöunda sæti) né í Sambandsdeildinni. 7-0 skellur gegn Fiorentina á síðasta leikdegi Sambandsdeildarinnar var ekki til að hjálpa sjálfstraustinu.

Stjórabreytingar urðu hjá LASK í september eftir slæma byrjun liðsins og Markus Schopp tók við en hefur ekki náð að bæta gengið.

Hvað segja veðbankarnir?
En þrátt fyrir slæmt gengi er LASK mun sigurstranglegra fyrir leikinn í kvöld. Ef horft er á stuðla Lengjunnar er 1,65 á LASK; 3,46 á jafntefli og 3,94 á sigur Víkings. Þegar fréttamaður renndi yfir erlenda veðbanka sást stuðull hæst upp á 4,70 á Víking.

Leikmannahópur LASK er mun betri en úrslit liðsins hafa sýnt og spurning hvort leikmenn nái að spýta í lófana og sýna almennilega frammistöðu í síðasta leik sínum á árinu.

Arnar Gunnlaugsson, þjálfari Víkings, ræddi um LASK í viðtali við Guðmund Aðalstein Ásgeirsson sem birtist í gær.

„Þetta er klárlega sterkt lið og það er engin tilviljun að þeir hafi verið í efsta styrkleikaflokki. Þeir eiga ekki lengur möguleika en það er erfitt að fabúlera um það hvort það hjálpi okkur eða ekki. En við eigum ekkert að vera að hugsa um það, við þurfum bara að klára þetta verkefni," sagði Arnar meðal annars.

Leikur LASK og Víkings í kvöld verður sýndur beint á Viaplay og Vodafone Sport. Þá verður hann í beinni textalýsingu hér á Fótbolta.net.