Enski sóknarmaðurinn Callum Wilson missir af næstu þremur leikjum Newcastle United eftir að það kom bakslag í endurhæfingu hans með liðinu en þetta segir blaðamaðurinn Craig Hope.
Þessi 32 ára gamli leikmaður meiddist í baki í sumar og hefur ekkert getað verið með Newcastle á þessu tímabili.
Vonast var eftir því að hann yrði klár í að vera í hóp gegn Chelsea um helgina, en nú er komið bakslag í endurhæfinguna.
Samkvæmt blaðamanninum Craig Hope meiddist Wilson aftan í læri á æfingu og er talið að hann missi af næstu þremur leikjum Newcastle.
Newcastle á þrjá erfiða leiki framundan. Liðið mætir Chelsea í ensku úrvalsdeildinni um helgina og síðan aftur í enska deildabikarnum um miðja næstu viku. Liðið mætir síðan Arsenal í ensku úrvalsdeildinni fyrstu helgina í nóvember.
Wilson skoraði níu mörk í deildinni með Newcastle á síðustu leiktíð.
Athugasemdir
