Ómar er fæddur árið 2004 og leikur sem sóknarmaður en hann er uppalinn í Fylki. Hann lék sinn fyrsta leik fyrir félagið árið 2021 og hefur komið við sögu í 15 leikjum í Bestu deildinni í sumar. Það er ljóst að Fylkir er fallið í Lengjudeildina.

Fylkir vildi halda honum en Ómar valdi að fara upp á Akranes.

„Við sjáum mikið eftir honum, það er alveg klárt. Það er bara þannig. Við hefðum gjarnan viljað sjá hann gera atlögu að Bestu deildinni með okkur."

„Það verður ekki. Í fótboltanum fær maður ekki allt sem maður vill. Við erum álíka pirraðir yfir þessu og stuðningsmenn ÍR yfir hinu," sagði Ragnar Páll léttur og var þá að tala um reiði stuðningsmanna ÍR gagnvart ráðningu Fylkis á Árna Frey Guðnasyni.