Það hefur verið mikil umræða eftir leikinn út af dómaramistökum sem áttu sér stað í stöðunni 3-3. ÍA skoraði þá löglegt mark sem var flautað af. Dómarinn, Elías Ingi Árnason, taldi sig hafa séð brot sem var svo alls ekki rétt. Í kjölfarið fóru Víkingar upp og gerðu sigurmarkið.

Það hefur skapast mikil reiði út af þessum mistökum þar sem þau hafa mikil áhrif í titilbaráttunni og einnig útilokuðu þau það að Skagamenn geti náð Evrópusæti.

„Það gekk bara mjög illa," sagði Arnar við Fótbolta.net um það hvernig hefði gengið að ná sér niður eftir leikinn í heimabæ sínum.

„Þetta var frábær leikur. Ég skil allt tilfinningaflóðið sem fór í umræðuna eftir leikinn hjá mínum mönnum upp á Skaga, hjá stuðningsmönnum Blika og fleirum. Við vorum heppnir á nokkrum augnablikum og sérstaklega í lokin. Það má samt ekki gleyma því hversu góðir við vorum í leiknum, það vantaði í umræðuna. Það má færa rök fyrir því að ef við hefðum ekki unnið leikinn; hvort það hefði verið rán ef við hefðum tapað leiknum. En miðað við hvernig leikurinn endaði þá skil ég þeirra bræði mjög vel. Við Víkingar höfum líka gengið í gegnum slíkt í sumar," segir Arnar og bætir við:

„Það er búið að tala rosalega mikið um dómaramistök þegar við Víkingar höfum hagnast á þeim í sumar en það hefur varla komið stafur um það þegar við höfum lent í dómaramistökum. Þegar það hefur gerst þá hef ég sprungið nokkrum sinnum og fengið leikbönn fyrir það. Svo hef ég líka ákveðið að tala ekkert um það. Eftir bikarúrslitaleikinn til dæmis. Þar voru ákveðin atvik í fyrri hálfleik sem VAR hefði breytt. Það hefur enginn áhuga á að hlusta á topplið væla."

„Það er kalt á toppnum. Það fara allir offorsi þegar við 'fáum eitthvað gefins'. Svo er rosa lítið fjallað um það þegar dómarnir halla á okkur. Kannski á það að vera þannig. Toppliðin þurfa enga gjöf og einhvern til að vorkenna sér þegar illa gengur."