Ekki byrjaði það vel fyrir Ham/Kam sem lenti undir eftir aðeins tvær mínútur en leikmenn voru fljótir að hrista það af sér með jöfnunarmarki í næstu sókn.

Viðar Ari hóf sóknina og lauk henni svo með góðu marki. Hann kom löngum bolta fram og var síðan mættur nokkrum sekúndum síðar að teignum til að klára færið eftir hælsendingu frá Julian Gonstad.

Kristian Lien skoraði sigurmark Ham/Kam á 59. mínútu og var það Brynjar Ingi sem lagði það upp. Hann átti langa sendingu inn fyrir á Lien sem afgreiddi boltann í netið.

Frábær byrjun hjá Íslendingunum í Ham/Kam. Stefán Ingi Sigurðarson lagði þá upp eina mark Sandefjord í 3-1 tapi gegn KFUM Oslo. Stefán vann skallaeinvígi og kom boltanum á Sander Mork sem skoraði.

Sveinn Aron Guðjohnsen spilaði síðustu tíu mínúturnar fyrir Sarpsborg sem vann Molde, 2-0, á útivelli.

Íslendingalið Norrköping vann Öster, 4-3, í miklum markaleik í fyrstu umferð sænsku úrvalsdeildarinnar, þar sem þeir Arnór Ingvi Traustason og Ísak Andri Sigurgeirsson voru báðir í byrjunarliði Norrköping.

Birnir Snær Ingason byrjaði þá í liði Halmstad sem fékk 5-0 skell gegn Degerfors á heimavelli. Gísli Eyjólfsson kom inn af bekknum fyrir Birni þegar hálftími var eftir.

Galdur Guðmundsson kom þá við sögu í dönsku B-deildinni, en hann kom inn af bekknum á lokamínútunum í 1-0 tapi Horsens gegn Odense. Horsens er í 3. sæti meistarariðilsins með 40 stig, þremur frá sæti í úrvalsdeildina.