Brasilíski sóknarmaðurinn Vinicius Junior kom Real Madrid yfir gegn Girona á 70. mínútu eftir gott spil. Federico Valverde fann Vinicius sem kláraði færið af yfirvegun.

Tíu mínútum síðar fékk Girona vítaspyrnu og þótti það afar undarlegur dómur. Boltinn fór í Marco Asensio í teignum og skoðaði dómarinn atvikið til að athuga með mögulega hendi.

Asensio fékk boltann á kassann og þaðan fór hann í hendina á honum. Dómarinn benti á punktinn og Madrídingar eðlilega ósáttir. Christian Stuani skoraði úr vítinu.

Rodrygo kom boltanum í netið undir lok leiksins en markið var réttilega dæmt af. Paulo Gazzaniga, markvörður Girona, var kominn með aðra hönd á boltann þegar Rodrygo sparkaði í hann og markið því ógilt.

Þýski miðjumaðurinn Toni Kroos fékk að líta sitt annað gula spjald seint í uppbótartíma fyrir pirringsbrot. Þetta er fyrsta rauða spjaldið sem Kroos fær á ferlinum.

Real Madrid er á toppnum eftir leikinn með 32 stig, einu stigi meira en Barcelona.

Inaki Williams var hetja Athletic Bilbao er liðið vann Villarreal 1-0 og þá vann Real Betis 2-0 sigur á Real Sociedad. Juan Cruz og Borja Iglesias skoruðu mörkin undir lok leiks.

Úrslit og markaskorarar:

Athletic 1 - 0 Villarreal
1-0 Inaki Williams ('59 )

Osasuna 2 - 0 Valladolid
1-0 Ezequiel Avila ('13 , víti)
2-0 Moi Gomez ('19 )

Real Sociedad 0 - 2 Betis
0-1 Juan Cruz ('86 )
0-2 Borja Iglesias ('90 )

Real Madrid 1 - 1 Girona
1-0 Vinicius Junior ('70 )
1-1 Christian Stuani ('80 , víti)
Rautt spjald: Toni Kroos, Real Madrid ('90)