Fyrirliðinn hefur verið á þvílíku flugi með Hömrunum á þessu tímabili og hjálpað liðinu í stigasöfnuninni.

Hún kom West Ham á bragðið á 35. mínútu í dag eftir að leikmaður Arsenal átti slaka sendingu til baka. Nýtti Dagný sér það og kom West Ham yfir.

Dagný skoraði stuttu fyrir það mark og var það ansi laglegt mark með skalla en það var dæmt af vegna brots í aðdragandanum. Vafasöm dómgæsla þar en Dagný sjálf lýsti yfir óánægju sinni með dóminn á samfélagsmiðlum.

„Afsakið... en hvar er brotið?" skrifaði Dagný við myndband af atvikinu.

Hægt er að sjá myndband af atvikinu hér fyrir neðan. Markið hefði verið það fyrsta í leiknum.

Dagný er búin að eiga frábært tímabil þar sem hún hefur oftast leikið framarlega á miðju hjá West Ham. Hún er næst markahæst í ensku úrvalsdeildinni með fjögur mörk.