Arsenal hóf árið á góðum 3-1 sigri á Brentford í 19. umferð ensku úrvalsdeildarinnar á Community-leikvanginum í dag.

Skytturnar fengu enga draumabyrjun. Kamerúnski sóknarmaðurinn Bryan Mbeumo skoraði eftir tæpar þrettán mínútur er hann fékk boltann á hægri vængnum, færði boltann á vinstri og setti boltann hárfínt í nærhornið.

Lærisveinar Mikel Arteta svöruðu rúmum fimmtán mínútum síðar er Gabriel Jesus hirti frákast frá Mark Flekken í teignum en stuttu áður hafði David Raya bjargaði á línu eftir að hafa misst skot Yegor Yarmoliuk aftur fyrir sig.

Í síðari hálfleiknum kláruðu Arsenal-menn dæmið á þremur mínútum.

Hinn 17 ára gamli Ethan Nwaneri fékk að taka hornspyrnurnar í fjarveru Bukayo Saka og gerði vel þegar hann kom boltanum inn í vel mannaðan teig. Flekken taldi sig hafa gert nóg til að koma hættunni frá en Mikel Merino hélt ekki og kom boltanum í markið.

Þremur mínútum síðar gerði Gabriel Martinelli út um leikinn en aftur var það Nwaneri sem var allt í öllu. Hann kom boltanum frá hægri yfir á vinstri. Boltinn fór af varnarmanni og til Martinelli sem lyfti boltanum upp og hamraði honum í hornið.

Brentford náði ekki að jafna sig eftir þessi tvö mörk og tók Arsenal öll stigin.

Arsenal er komið upp í annað sæti með 39 stig, nú aðeins sex stigum frá Liverpool sem að vísu á leik til góða en Brentford er í 12. sæti með 24 stig.