Greint hefur verið frá því að Dele Alli var mættur til Ítalíu um helgina þar sem hann horfði á Como leggja AS Roma að velli í efstu deild ítalska boltans.
Como eru nýliðar í Serie A deildinni og leika undir stjórn Cesc Fábregas. Það er mikið af frægu fólki sem styður við fótboltafélagið Como, enda er borgin staðsett við heimsfrægt Como-vatn sem laðar að sér Hollywood-stjörnur.
Margar af þessum stjörnum eiga gullfalleg hús við vatnið og eru þegar byrjaðar að styðja við bakið á fótboltafélaginu Como.
Dele Alli er 28 ára gamall og hefur átt gríðarlega erfitt uppdráttar á síðustu árum. Hann þótti bráðefnilegur fótboltamaður og var mikilvægur hlekkur í liði Tottenham og enska landsliðsins allt þar til hann missti sjálfstraustið og byrjaði að lenda í meiðslavandræðum.
Alli hefur spilað fyrir Everton og Besiktas á síðustu árum án þess að ná árangri. Hann hefur verið að glíma við tíð meiðsli og vonast Cesc Fábregas til að leikmaðurinn geti fundið sitt gamla form í rólegheitunum á Ítalíu.
Como er í fallbaráttu í ítalska boltanum, með 15 stig eftir 16 umferðir.
Hjá Como gæti Dele Alli spilað með leikmönnum á borð við Sergi Roberto, Alberto Moreno, Pepe Reina og Andrea Belotti.
Alli byrjar að æfa með Como 26. desember. Hann getur verið skráður með Como í ítalska boltann eftir áramót.
Athugasemdir
