Ísland er undir gegn Wales í Cardiff en liðið þarf að vinna til að komast í umspil um sæti í A deild Þjóðadeildarinnar.
Ísland komst yfir snemma leiks en Wales komst inn í leikinn og jafnaði metin og komst svo yfir með marki undir lok fyrri hálfleiks.
Lárus Orri Sigurðsson og Albert Brynjar Ingason, sérfærðingar á Stöð 2 Sport, voru sérstaklega ósáttir með íslenska liðið í seinna marki Wales.
„Maður hefur áhyggjur af því þegar leikurinn slitnar er að miðjan okkar er galopin. Maður var að vonast til að Ísak yrði á miðjunni. Með Arnór Ingva og Jóa Berg á miðjunni gæti orðið hættulegt. Það er erfitt fyrir hafsentana að spila ef þeir fá ekki betri hjálp frá miðjunni," sagði Lárus Orri.
Valgeir Lunddal Friðriksson átti slæma sendingu í aðdraganda seinna marksins sem Walesverjar komust inn í og skoruðu í kjölfarið.
„Þetta er ömurleg ákvörðun hjá Valgeiri Lunddal að senda þessa sendingu. Það er mínúta eftir af uppbótatíma og við erum að fara í hálfleik með fína stöðu. Líttu upp og sjáðu að Jói er ekki tilbúinn að fá sendingu, í burtu með þetta," sagði Albert Brynjar.
Jóhann Berg Guðmundsson var tekinn af velli í hálfleik fyrir Stefán Teit Þórðarson en staðan er enn 2-1 fyrir Wales þegar rúmar fimm mínútur eru liðnar af seinni hálfleik.
