Íslenska landsliðið mætir Wales í algjörum úrslitaleik í Þjóðadeildinni í kvöld. Með sigri kemst Ísland í umspil um sæti í A deild.
Ísland hefur átt í vandræðum með að spila tvo góða hálfleika í Þjóðadeildinni en Lárus Orri Sigurðsson, sérfræðingur á Stöð 2 Sport, segir að menn verði að vera 100 prósent í kvöld til að vinna.
„Ef það þarf að gíra menn upp fyrir svona leiki á svona stundum þá eru menn á rangri hillu. Þetta á að vera borðleggjandi, þú átt að vera klár í svona leiki. Það verður áhugavert að sjá með hvað leikplan við komum með inn í þennan leik," sagði Lárus Orri.
Íslenska liðið hefur verið í vandræðum með að ná stöðugleika í vörninni en Aron Einar Gunnarsson er meiddur og Logi Tómasson í banni. Þrjár breytingar eru á liðinu frá sigrinum gegn Svartfjallalandi í síðustu umferð.
Alfons Sampsted og Guðlaugur Victor Pálsson koma inn í vörnina og þá kemur Ísak Bergmann Jóhannesson inn á miðjuna.
