Taylor Harwood-Bellis, varnarmaður Southampton, spilaði sinn fyrsta landsleik fyrir England í 5-0 sigri gegn Írlandi í kvöld og hann gerði gott betur því hann skoraði fimmta mark liðsins.
Harwood-Bellis er trúlofaður Leah Keane sem er dóttir Roy Keane en Keane, sem er frá Írlandi, skaut á tengdasoninn sinn eftir leikinn í útsendingu ITV Sport.
„Þetta er súrsætt fyrir mig," sagði Keane en Mark Pougatch, kynnir hjá ITV Sport, sagði þá: „Það vita það ekki allir en hann er verðandi tengdasonur þinn."
„Það er ekki alveg klárt. Hlutirnir eru fljótir að breytast á heimili Keane fjölskyldunnar," sagði Keane sem hrósaði Harwood-Bellis í kjölfarið.
„Það er gott hjá honum að spila sinn fyrsta landsleik, hann er hættulegur fyrir framan markið. Hann er góður strákur og fjölskyldan hans hefur gert mjög vel."
