Ítalski þjálfarinn Roberto Mancini er hættur með sádi-arabíska landsliðið aðeins ári eftir að hafa skrifað undir fjögurra ára samning en þetta kemur fram í tilkynningu sádi-arabíska fótboltasambandsins í dag.
Mancini tók við Sádi-Arabíu í ágúst á síðasta ári og stýrði liðinu í Asíubikarnum.
Liðið tapaði í 16-liða úrslitum fyrir Suður-Kóreu í janúar á þessu ári.
Samningurinn var til fjögurra ára en Mancini og fótboltasamband Sádi-Arabíu hafa komist að samkomulagi um að rifta samningnum.
Mancini stýrði liðinu í 20 leikjum, þar sem hann vann átta, gerði sjö jafntefli og tapaði fimm.
Landsliðið er komið í þriðju umferð í undankeppni HM og situr sem stendur í 3. sæti C-riðils. Liðin í tveimur efstu sætunum fara beint á HM, en þau lið sem hafna í 3. og 4. sæti riðilsins fara áfram í næstu umferð.
Athugasemdir
