![Lengjudeildin](/images/leng_150x150.png)
„Skelfilegt að tapa 3-1, mér finnst það svolítið stór munur miðað við færin. Aron (Birkir Stefánsson) varði mjög vel, þrisvar meistaralega, hann er frábær markmaður og sýndi það í dag. Við hefðum kannski átt að klára betur," sagði Dragan Stojanovic, þjálfari Dalvíkur/Reynis, eftir tap á heimavelli gegn Þór í kvöld.
Þórsarar voru betri stærstan hluta fyrri hálfleiks en Dalvíkingar fengu þó sín færi. Þórsarar leiddu 0-2 í hálfleik, komust svo í 0-3 í seinni hálfleik áður en heimamenn minnkuðu muninn.
Þórsarar voru betri stærstan hluta fyrri hálfleiks en Dalvíkingar fengu þó sín færi. Þórsarar leiddu 0-2 í hálfleik, komust svo í 0-3 í seinni hálfleik áður en heimamenn minnkuðu muninn.
Lestu um leikinn: Dalvík/Reynir 1 - 3 Þór
Dragan var spurður út í mörkin hjá Þórsurum. Hann var vægast sagt ekki ánægður með varnarleik sinna manna í þeim færum.
„Ekki smá sofandi, menn voru alveg sofandi í fyrsta markinu! Ég var búinn að kalla á menn að fara fyrir utan vítateig og blokkera skotið. Við eigum að gera miklu betur í öðru markinu og líka í þriðja markinu, hælspyrna, eitthvað kjaftæði, leit kannski út fyrir að vera flott en það er bara kjaftæði að fá á sig svona mark. Þetta er næstum alveg eins mark og við fengum á okkur á móti Grindavík. Í bæði skiptin snúa leikmennirnir sem skora bakinu í okkar mark, þetta er mjög slæmt. Við eigum að gera betur og getum gert það. Við erum búnir að spila vel varnarlega marga leiki í röð, þess vegna er mjög slæmt að fá svona mörk á okkur."
Dragan var ánægður með seinni hálfleikinn, liðið hans skapaði færi en Þórsarar gerðu út um leikinn með þriðja markinu. „Það er alltaf erfitt að koma til baka úr 3-0. Ég er mjög ánægður með seinni hálfleik. Við erum í sterkari deild en í fyrra. Í fyrra var ekki vandamál ef við byrjuðum ekki leik alveg frá fyrstu mínútu, vorum kannski að vakna eftir 10-15 mínútur. Í þessari deild er það mjög erfitt eins og sést í dag."
Dragan var spurður út í dómgæsluna í leiknum. „Línan var ekki bein, en þetta var bara allt í lagi, fínt. Við ætlum ekki að hugsa um dómarann, við þurfum bara að gera betur."
Frábært veður og rúmlega full stúka
Það var virkilega vel mætt á Dalvíkurvöll í kvöld, stúkan troðfull og mikið af fólki í brekkunni við hlið stúkunnar. Veðrið var mjög gott, hreyfði varla vind og ríflega tíu stiga hiti.
„Þetta var allt frábært, full stúka og meira en það. Það er kannski betra að fá rigningu, vind og vinna leik," sagði Dragan og brosti.
Þurfa að hætta að hjálpa andstæðingunum
Hann var svo spurður út í framhaldið. „Við þurfum að byrja að vinna leiki. Við unnum ÍBV sem var frábært, þeir hafa sýnt að þeir eru mjög gott lið. Með því að sýna að við getum unnið þá, þá getum við unnið fleiri leiki. Við þurfum að hætta að hjálpa andstæðingum okkar að vinna leikina á móti okkur. Það er númer eitt, tvö og þrjú. Við þurfum að spila fyrir okkur, ekki hjálpa þeim. Þá getum við unnið leik," sagði Dragan.
Athugasemdir