Viðar Örn Kjartansson leikmaður KA var ánægður með úrslit kvöldsins eftir að liðið hans vann 2-1 sigur í dramatískum leik.
„Ég er ekkert eðlilega sáttur að við unnum leikinn. Við erum í þannig stöðu að, þú sérð að sjálfstraustið er að verða meira en það var erfitt að ná fyrsta markinu inn í dag. Það verður svo bara erfiðara og erfiðara eftir því sem tímanum líður, og það er vegna þess að við erum í stöðunni sem við erum í. En ég er ekkert eðlilega sáttur, mér fannst þetta eitt af betri frammistöðum okkar í sumar."
KA spilaði á köflum í þessum leik eiginlega óaðfinnanlega og það var hægt að sjá að menn höfðu gaman af þessu. Eitthvað sem hefur ekki mikið sést hjá KA í sumar.
„Við vorum bara allir á réttum stað, allir 'full focus', að vinna fyrir hvorn annan. Mér fannst allt bara í spilinu í dag frábært, vörnin stóð sig frábærlega og við vorum að gera þetta allt sem lið. Á eðlilegum degi hefðum við unnið með fleiri mörkum, en ég er bara ekkert eðlilega sáttur með strákana í dag. Við vorum að sýna aðeins hvað við getum og nú verðum við bara að bæta í."
Viðar var í færunum í dag en markið kom ekki. Hann er þá ekki enn búinn að skora fyrir KA en frammistaða hans í dag var mjög góð.
„Maður hefur ekki byrjað leik síðan í Apríl og maður er kannski ekki alveg með sama sjálfstraustið fyrir framan markið. Þú þarft kannski bara eitt mark inn, og þá koma fleiri í þokkabót. Ég skoraði eitt þar sem ég var rangstæður, það svona sat aðeins í mér og ég klúðraði einhverjum 2-3 færum þarna. En svona talandi um það þá fannst mér ég gera allt vel í dag fyrir utan að skora, og ég er miklu meira 'fit' núna. Þegar þú ert að fá færin þá er bara tímaspursmál hvenær mörkin fara að dælast inn."
Viðar fann eitthvað til eftir leik og var haltrandi, hann segist hinsvegar ekki hafa miklar áhyggjur af því.
„Þetta truflaði mig allavega ekki mikið í dag, þetta er eitthvað aðeins í vöðvanum og vonandi verður þetta gott fyrir þriðjudaginn næsta. En þetta hefur verið að plaga mig í hnénu í langan tíma. Það var í raun barnalegt af mér að vera spila fyrstu 4-5 leikina. En það er svona ég get ekki breytt því núna. En ég er gríðarlega sáttur í dag og hefði maður skorað mark hefði maður verið extra sáttur."
Viðtalið má sjá í heild sinni í spilaranum hér fyrir ofan en þar talar Viðar nánar um sögusagnirnar sem hafa verið í kringum hann og riftunarákvæðið sem er í samningnum hjá honum.
