„Mér líður illa. Það er ömurlegt að við höfum ekki náð að klára þennan leik.“ sagði Pálmi Rafn Pálmason, þjálfari KR eftir 2-2 jafntefli gegn Fylki í Vesturbænum í kvöld.
Lestu um leikinn: KR 2 - 2 Fylkir
KR komst tvisvar yfir í leiknum en vann hann ekki. Er það eitthvað sem Pálmi er ennþá meira pirraður með?
„Ég er óánægður með að vinna ekki. Það sem er verra er að ef þetta hefðu verið mörk sem ekki hefði verið hægt að koma í veg fyrir væri ég kannski ekki jafn óánægður. En þegar við sleppum inn tveimur mörkum á móti liði sem skapar sér ekki meira en þetta, það er ástæðan fyrir því að við erum í veseni.“
Pálmi var mjög ósáttur með muninn á leikjunum gegn Víkingi og í kvöld. Þá aðalega með varnarleikinn.
„Við sýndum það hvernig við getum varist sem lið í síðasta leik og við sýndum það meira og minna allan leikinn þá. Í þessum leik erum við mun minna að verjast en þegar það kemur að því að verja markið okkar erum við ekki nógu góðir. Það er bara óstöðugleiki í varnarleiknum hjá okkur, það er eitthvað sem ég þarf að laga.“
Varnarleikurinn var alls ekki upp á marga fiska í dag hjá KR-ingum.
„Þetta var ekki nógu gott hjá okkur, langt því frá. Þegar einbeitingin er ekki til staðar og þú gerir allavegana ekki erfitt fyrir mótherjann að skora mark, þá áttu ekkert mikið skilið.“
Pálmi var spurður út í það hvort KR-liðið þarf einn sigur til þess að fá sjálfstraustið aftur og komast á gott skrið.
„Við höfum ekki neitt efni á því að hugsa annað en einn leik í einu. Nú þurfum við að reyna að kryfja þennan leik og reyna að laga það sem fór úrskeðis fyrir næsta leik.“
Viðtalið við Pálma má sjá í heild sinni í spilaranum hér að ofan.