Þessi tvítugi leikmaður eyddi síðustu leiktíð á láni hjá Ipswich en hann kom að sextán mörkum er liðið kom sér upp í ensku úrvalsdeildina.

Eftir tímabilið lýstu félög frá Þýskalandi áhuga á að landa honum frá Chelsea, en Ipswich situr nú í bílstjórasætinu eftir að Kieran McKenna ákvað að halda kyrru fyrir á Portman Road.

Ipswich hefur nú opnað viðræður við Chelsea um kaup á Hutchinson en talið er að félagið vilji fá um 30 milljónir punda fyrir leikmanninn.

Nýliðarnir eru að vonast til þess að viðræðurnar gangi hratt fyrir sig og að Hutchinson verði klár fyrir undirbúningstímabilið.

Hutchinson er fæddur og uppalinn á Englandi, en er með fjölskyldutengsl til Jamaíku. Hann hefur spilað tvo leiki undir stjórn Heimis Hallgrímssonar, en hefur þó ekki tekið endanlega ákvörðun varðandi landsliðsvalið.

Enska fótboltasambandið hefur mikinn áhuga á því að fá Hutchinson til að spila með U21 árs landsliðinu, en hann er enn að gera upp hug sinn. Samkvæmt reglum FIFA getur hann enn skipt um landslið þar sem hann hefur aðeins spilað í Þjóðadeild og einn vináttulandsleik.