Hollenski stjórinn Erik ten Hag mun á næstu dögum framlengja samning sinn við Manchester United. Athletic segir frá þessu og munu þeir Ruud van Nistelrooy og Rene Hake þá koma inn í þjálfaraliðið.
Manchester United tók sér dágóðan tíma í að ákveða framtíð Ten Hag eftir tímabilið.
Margir voru orðaðir við stjórastöðuna en eftir að hafa fundað um gengi liðsins á síðasta tímabili var ákveðið að hann fengi tækifæri til að leiða liðið áfram.
Stjórn United er nú í viðræðum við Ten Hag um nýjan samning en samkvæmt Athletic verður gengið frá þeim viðræðum á næstu dögum.
Ruud van Nistelrooy og Rene Hake koma inn í þjálfarateymi Ten Hag, en van Nistelrooy var áður þjálfari PSV á meðan Hake var þjálfari Willums Þór Willumssonar í Go Ahead Eagles.
Mitchell van der Gaag og Benni McCarthy, sem hafa verið í teymi Ten Hag síðustu tvö ár eru báðir á förum en þeir vilja gerast aðalþjálfarar.
Ten Hag hefur unnið tvo titla á tveimur árum sínum hjá United en hann vann enska deildabikarinn á síðasta ári og síðan ensku bikarkeppnina í síðasta mánuði.
Athugasemdir
