„Tilfinningin er algjörlega ömurleg," sagði Jóhann Kristinn Gunnarsson þjálfari Þórs/KA eftir tap gegn Breiðabliki eftir framlengdan leik í Mjólkurbikarnum í kvöld.
Lestu um leikinn: Þór/KA 1 - 2 Breiðablik
„(Leikurinn spilaðist) að mörgu leyti eins og við vildum. Hann var frekar lokaður, hleyptum þessu ekki upp í einhverja vitleysu, við lokuðum vel á sérvalið lið en svo ræðst þetta á einhverju rugli hérna í restina því miður."
Írena Héðinsdóttir Gonzalez skoraði sigurmarkið beint úr hornspyrnu.
„Við erum alltaf vonsvikin þegar við fáum á okkur mörk. Það er ekki hægt að taka einn útúr jöfnunni í því en við viljum auðvitað að þeir sem eru með hanskana verji þegar boltinn kemur á markið, stundum er það erfitt og stundum er það ekki hægt. Ég þarf bara að skoða þetta aftur," sagði Jóhann Kristinn.
Það er mikið álag á liðinu þessa dagana en liðið spilaði á þriðjudaginn gegn Val og mætir FH á miðvikudaginn næsta.
„Mér fannst aðdáunarvert hvernig liðið mitt tæklaði þennan leik með framlengingu og öllu saman, það sýnir bara úr hverju stelpurnar eru gerðar. Ég efast um að mér hafi fundist svona sterklega að lið hafi ekki átt skilið að tapa eins og liðið mitt í dag," sagði Jóhann Kristinn.