Guðrún Arnardóttir og stöllur hennar í Rosengård unnu fjórtánda leik sinn í sænsku úrvalsdeildinni í dag og það með stæl er þær niðurlægðu Trelleborg, 8-1, í Malmö.
Íslenska landsliðskonan var ekki með Rosengård annan leikinn í röð en hún er að glíma við veikindi.
Rosengård var að mæta Trelleborg annan leikinn í röð en í fyrri leiknum vann toppliðið 9-1 sigur á útivelli og fylgdi honum vel á eftir með því að vinna 8-1 í dag.
Liðið hefur unnið alla fjórtán leiki sína í deildinni og er með níu stiga forystu á toppnum.
Áslaug Dóra Sigurbjörnsdóttir og Katla María Þórðardóttir voru báðar í byrjunarliði Örebro sem gerði markalaus jafntefli við Vittsjö. Bergþóra Sól Ásmundsdóttir var ónotaður varamaður á bekknum, en Örebro er í 9. sæti með 14 stig.
Þórdís Elva Ágústsdóttir og Bryndís Arna Níelsdóttir byrjuðu báðar í 2-1 tapi Växjö gegn Linköping. Växjö er í 10. sæti með 14 stig.
Häcken og Kristianstad gerðu markalaust jafntefli. Guðný Árnadóttir, Hlín Eiríksdóttir og Katla Tryggvadóttir voru allar í byrjunarliði Kristianstad sem er í 4. sæti með 26 stig.
Athugasemdir