Íslands- og bikarmeistarar Víkings unnu 2-1 sigur á Fram í 13. umferð Bestu deildar karla í Víkinni í kvöld.

Framarar mættu sterkir til leiks í Víkina. Þeir pressuðu Víkinga hátt uppi en heimamenn náðu betri tökum á leiknum eftir fimmtán mínútur.

Ólafur Íshólm Ólafsson, markvörður Fram, varði gott skot frá Danijel Dejan Djuric og stuttu síðar varði hann aftur í slá og yfir markið.

Víkingar brutu ísinn á 19, mínútu. Gunnar Vatnhamar átti frábæra sendingu á Valdimar Þór Ingimundarson sem skoraði.

Á 32. mínútu stangaði Magnús Þórðarson boltanum í netið eftir fyrirgjöf Haralds Einars Ásgrímssonar. Markið var dæmt af vegna rangstöðu, en það mátti ekki miklu muna.

Framarar voru sterkari aðilinn næstu mínúturnar en fengu síðan annað mark í andlitið á 39. mínútu. Karl Friðleifur Gunnarsson átti fyrirgjöf frá endalínu og inn á Danjiel sem kom boltanum í netið.

Færin voru á báða bóga í upphafi síðari hálfleiks. Karl Friðleifur átti skot sem Ólafur Íshólm varði áður en Helgi Guðjónsson skaut í stöng.

Þremur mínútum síðar minnkaði fyrirliðinn Guðmundur Magnússon muninn með góðum skalla eftir fyrirgjöf Magnúsar og kom Frömurum aftur inn í leikinn.

Framarar ógnuðu eftir markið og komu sér í ágætar stöður en nýttu ekki nægilega vel.

Á síðustu fimmtán mínútum leiksins héldu gestirnir áfram að pressa á toppliðið og fengu fullt af sénsum til að jafna leikinn en Víkingar héldu út og eru nú með 33 stig á toppnum, sjö stigum á undan Breiðabliki.

Fram er áfram í 6. sæti með 16 stig.