![Lengjudeildin](/images/leng_150x150.png)
„Tilfinningin er súr. Mér fannst þetta vera 0-0 leikur," sagði Haraldur Árni Hróðmarsson, þjálfari Grindavíkur, eftir 1-0 tap gegn Þrótti í Lengjudeildinni í kvöld.
Þetta var fyrsta tap Haraldar við stjórnvölinn hjá Grindavík en hann hefur farið afar vel af stað með liðið.
Þetta var fyrsta tap Haraldar við stjórnvölinn hjá Grindavík en hann hefur farið afar vel af stað með liðið.
Lestu um leikinn: Þróttur R. 1 - 0 Grindavík
„Þróttararnir spiluðu betur en við í dag. Ég held að sé á hreinu, en að sama skapi eru færin mjög fá. Markið þeirra eru bara mistök hjá okkur sem var óþarfi. Ég er svekktur að við náum ekki að skapa meira fram á við. Mér fannst við geta fengið stigið."
„Það er við að skjóta okkur í fótinn sem tapar þessum leik fyrir okkur. Það vantaði púður fram á við líka. Ég er mjög ánægður með margt í mínu liði. Við erum með börn að spila og erum í smá leikjaálagi. Fólkið okkar í Grindavík vill sjá heimastrákana spila og þessir strákar eru að spila því þeir eru ofboðslega efnilegir og eru á góðri siglingu."
Halli er uppalinn Þróttari og var að snúa aftur á gamla heimavöllinn sinn í kvöld.
„Það voru tilfinningar í því að koma og spila við Þrótt. Ég held að ég hafi þjálfað eiginlega alla í byrjunarliðinu hjá þeim einhvern tímann í yngri flokkunum. Þekki þessa gaura og fjölskyldur þeirra. Það var gaman fyrir mig að koma hingað og svolítið erfitt líka. Mér er drullusama fyrir hverjum ég tapa, það er alltaf pirrandi," sagði Halli.
Um framhaldið sagði hann: „Ég ætla ekki að einblína of mikið á töfluna. Það skiptir engu máli því það eru svo fáir leikir búnir. Við höfum ekki mikinn tíma á milli leikja en við erum að reyna að setja saman mannskap til að vinna þessa leiki og þróa með okkur leikstíl. Við erum komnir stutt og maður þarf að passa sig á því að vera ekki óþolinmóður. Að tapa einum leik er partur af þessu. Í svona leik eigum við bara að halda hreinu. Á meðan við náum að halda hreinu fáum við stig og erum ekki að detta niður í neina fallbaráttu. Við þurfum að hugsa um það líka."
Hægt er að horfa á allt viðtalið í spilaranum hér að ofan.
Athugasemdir