Declan Rice, leikmaður Englands, kom sér í vandræði eftir 2-1 sigurinn á Slóvakíu í 16-liða úrslitum Evrópumótsins í kvöld, en hann lenti í orðasaki við Francesco Calzona, þjálfara Slóvakíu.
Eftir dramatískan sigur Englendinga ætlaði Calzona að ganga upp að dómarateyminu til að spyrja út í nokkrar ákvarðanir sem hann var ósáttur með leiknum.
Rice stóð þá hjá dómaranum til að þakka honum fyrir leikinn en lenti fljótlega eftir það í stympingum. Calzona ýtti Rice og þá tók einn af aðstoðarmönnum hans utan um háls Rice.
Englendingurinn var eðlilega ekki sáttur með allt þetta en liðsfélagar hans mættu á svæðið og færðu hann í burtu.
„Haltu kjafti, bleyðan þín. Haltu kjafti sköllótta fífl,“ sagði Rice við Calzona, en þetta staðfestir varalesarinn Jeremy Freeman.
Það tókst að stilla til friðar stuttu eftir þetta atvik en Calzona sagði eftir leikinn að Rice hefði beðist afsökunar á framferði sínu.
„Rice átti að fara til dómarana, kveðja og yfirgefa staðinn. Ég þurfti að tala við dómarana en hann hélt bara áfram að tala. Hann baðst síðan afsökunar og þar með var því lokið,“ sagði Calzona á blaðamannafundinum.
Athugasemdir