Árni Freyr Guðnason, þjálfari ÍR, hefði viljað fá fleiri stig út úr leiknum þegar hans lið gerði 1-1 jafntefli við Þór í 10. umferð Lengjudeild karla í dag.
Lestu um leikinn: ÍR 1 - 1 Þór
„Við lítum á þetta sem tvö töpuð stig alveg klárlega. Það var rosalegur vindur og erfiðar aðstæður. Við náum að jafna snemma í seinni hálfleik og vorum með vindinn með okkur og gátum sett soldið pressu á þá og vorum bara klaufar að nýta ekki færin sem við fengum.“
Árni gerði tvöfalda breytingu í hálfleik þegar hann Marteinn Theodórsson og Aron Daníel Arnalds komu inn fyrir Renato Punyed og Hrafn Hallgrímsson.
„Við höfum ekkert út á þá að setja sem spiluðu í fyrri hálfleik. Þetta voru erfiðar aðstæður og með Renato sem er meiri miðjumaður út í vængbakvörðinn og það gekk bara ekki upp. Við vissum að við gætum farið hærra þannig við settum sóknarvængmenn inn og það gekk bara fínt. Ef við hefðum unnið þá hefði ég verið sáttari með skiptinguna en jú þetta gekk fínt.“
Það hefur verið spilað nokkuð þétt að undanförnu í Lengjudeildinni.
„Það eru einhver meiðsli en við erum með stóran og jafnan hóp. Þannig við treystum öllum þeim sem koma inn á og spila hjá okkur. Það er bara næsti maður kemur inn.“
Félagsskiptaglugginn opnar bráðlega á Íslandi og var Árni því spurður út í það hvort hann ætli sér að aðhafast eitthvað í þeim glugga.
„Já já ég þarf kannski að ræða við formanninn og svona. Jú við reynum örugglega eitthvað. Þessi deild er svolítið að bíða eftir því hvað efsta deildin gerir og þá losnar eitthvað þar og svona. Við erum aðeins farnir að skoða í kringum okkur og það kemur bara í ljós.“
Viðtalið má sjá í heild sinni í spilaranum hér að ofan.
