Danski miðjumaðurinn Jesper Lindström hefur verið frábær með Eintracht Frankfurt.
Hann er aðeins 22 ára gamall en þegar orðinn lykilmaður og var partur af liðinu sem vann Evrópudeildina á síðustu leiktíð.
Hann skoraði 5 mörk í 39 leikjum þá en er þegar búinn að skora 7 mörk í 17 leikjum á nýju tímabili.
Lindström er sóknarþenkjandi miðjumaður að upplagi og getur einnig spilað sem sóknartengiliður eða vinstri kantur.
Hann hefur vakið mikla athygli á sér og greinir Bild frá því að bæði Borussia Dortmund og RB Leipzig vilji kaupa hann til sín. Verðmiðinn verður þó minnst 30 milljónir evra en fer líklega vel yfir 40 milljónir miðað við þróun leikmannsins á tímabilinu og þá staðreynd að hann er samningsbundinn til 2026.
Lindström á eitt mark í sex landsleikjum fyrir Danmörku.
