Það voru nokkrir Íslendingar sem komu við sögu í ítalska boltanum í dag og er Albert Guðmundsson á varamannabekk Genoa sem er að spila í Serie B þessa stundina.
Í efstu deild kvenna lék Anna Björk Kristjánsdóttir allan leikinn er Inter tapaði gegn Roma á heimavelli.
Roma komst í tveggja marka forystu og vann að lokum 1-2 og er á toppi deildarinnar, með 21 stig eftir 8 umferðir. Inter er í þriðja sæti eftir tapið, með 17 stig.
Guðný Árnadóttir lék þá allan leikinn í varnarlínu AC Milan sem tapaði óvænt gegn Pomigliano og situr eftir með 12 stig.
Inter 1 - 2 Roma
Pomigliano 2 - 1 Milan
Í B-deildinni lék Hjörtur Hermannsson allan leikinn í markalausu jafntefli hjá Pisa gegn Benevento.
Pisa er aðeins komið með 11 stig eftir 11 umferðir en Hjörtur hefur ekki verið mikið í byrjunarliðinu á tímabilinu. Þetta var þó annar heili leikurinn hans í röð og gæti Hjörtur unnið sér inn byrjunarliðssæti með góðri frammistöðu í næstu leikjum.
Enginn Íslendingur var þá í hópi Venezia sem tapaði heimaleik gegn Ascoli.
Bjarki Steinn Bjarkason er meðal Íslendinga sem eru samningsbundnir Feneyingum en Venezia er að ganga herfilega og er í fallsæti með 9 stig.
Benevento 0 - 0 Pisa
Venezia 0 - 2 Ascoli
