Varnarmaðurinn ungi og efnilegi hefur átt erfitt uppdráttar síðan hann kom til Vålerenga frá Lecce fyrir tímabilið.

Hann spilaði níu deildarleiki fyrir Vålerenga áður en hann missti sæti sitt og hefur gengið erfiðlega að koma sér aftur í byrjunarliðið. Þá fékk hann tækifæri í bikarnum gegn Brumunddal í júní en það er síðasti leikurinn sem hann byrjaði.

Það var svolítið lán í óláni að miðvörður Vålerenga meiddist í síðasta leik og kom Brynjar inn fyrir hann. Þá fékk hann tækifærið í liðinu í kvöld í 3-3 jafntefli gegn Sarpsborg.

Vålerenga er í 5. sæti deildarinnar með 43 stig þegar tveir leikir eru eftir af deildinni.

Bjarni Mark skoraði með hjólhest og Jónatan lagði upp tvö

Íslendingarnir í B-deildinni voru heldur betur í stuði í dag. Valdimar Þór Ingmundarson skoraði í 3-0 sigri Sogndal á Raufoss en það var Jónatan Ingi Jónsson sem lagði upp mark hans. Þá lagði Jónatan upp annað mark sitt í leiknum nokkrum mínútum síðar.

Valdimar fór a velli á 89. mínútu en Jónatan spilaði allan leikinn í dag. Þetta var lokaumferð B-deildarinnar og missti Sogndal af umspilssæti þetta árið.

Bjarni Mark Antonsson og hans menn í Start eru hins vegar á leið í umspilið. Siglfirðingurinn skoraði stórbrotið mark með hjólhestaspyrnu eftir hálftímaleik og hjálpaði liðinu að vinna góðan 2-1 sigur á Ranheim. Start klárar deildina í 3. sæti og er nú á leið í umspilið.

Pálmi Rafn Arinbjörnsson fékk þá tækifærið í lokaumferðinni með Skeid. Hann spilaði í markinu í 1-0 tapi fyrir Stjordals-Blink. Þetta var fyrsti og eini leikur Pálma fyrir Skeid en hann er á láni frá Wolves á Englandi.