Alex Freyr Elísson er að ganga í raðir Breiðabliks frá Fram en hann kvaddi liðsfélaga, stjórn og stuðningsmenn félagsins á lokahófi í gær.
Þessi öflugi bakvörður er uppalinn í Fram og spilaði fyrstu leiki sína fyrir meistaraflokk árið 2015.
Hann var alger lykilmaður er Fram fór taplaust í gegnum Lengjudeildina á síðasta ári.
Alex, sem er fæddur árið 1997, var magnaður með Frömurum í sumar og hjálpaði liðinu að tryggja sæti sitt í Bestu deildinni en hann lék 19 leiki og skoraði 2 mörk.
Síðustu vikur hefur hann verið sterklega orðaður við Breiðablik en 433.is greindi frá því á dögunum að hann væri búinn að skrifa undir hjá félaginu.
Leikmaðurinn hefur nú staðfest þær fregnir en hann kvaddi liðsfélaga,stjórn og stuðningsmenn félagsins á lokahófi Fram í gærkvöldi.
Athugasemdir