Guðmundur Kristjánsson
Guðmundur Kristjánsson, leikmaður FH, spilaði í gær sinn síðasta leik fyrir félagið ef marka má heimildir Fótbolta.net.
Guðmundur, sem er uppalinn í Breiðabliki, fór til Noregs árið 2012 og spilaði þar með Start.
Hann var fastamaður í liðinu þau fimm ár sem hann spilaði með liðinu áður en hann snéri aftur heim og samdi við FH.
Guðmundur kom inn af bekknum í 2-1 tapi FH gegn ÍA í gær en það var hans síðasti leikur fyrir félagið. Samkvæmt heimildum Fótbolta.net kvaddi hann liðsfélaga sína inn í klefa eftir leikinn og mun hann ganga í raðir Stjörnunnar.
Sigurvin Ólafsson, þjálfari FH, vildi lítið tjá sig um framtíð Guðmundar er Sverrir Örn Einarsson, fréttamaður Fótbolta.net, ræddi við hann eftir að sæti FH í efstu deild var staðfest.
„Það á eftir að koma í ljós eins og með margt annað. Hann hefur farið á miðjuna í öðrum leikjum líka en ég raðaði þessu svona upp í dag og miðað við frammistöðuna sem var almennt í leiknum þá hefði það átt að duga en það fór sem fór," sagði Sigurvin við Fótbolta.net.
Athugasemdir
