Sænski framherjinn Viktor Gyökeres mun ekki fara til Manchester United í þessum mánuði en þetta segir enski vefmiðillinn Mirror í dag.
Á dögunum var greint frá því að United ætlaði að reyna fá Gyökeres í þessum glugga.
Gyökeres er 26 ára gamall og tókst að skora 62 mörk með Sporting og sænska landsliðinu á síðasta ári.
Öll stærstu félög Evrópu eru með hann í sigtinu en ljóst er að United mun ekki berjast um hann í þessum glugga.
Ruben Amorim, stjóri Man Utd, lofaði því rétt áður en hann yfirgaf Sporting að hann myndi ekki kaupa leikmenn frá félaginu á miðju tímabili, en vildi halda öllu opnu fyrir sumargluggann.
„Ég ætla ekki að kaupa leikmenn frá Sporting í janúar, en ég veit ekki hvað ég mun gera í sumar,“ sagði Amorim á blaðamannafundinum.
Mirror segir að Amorim ætli að standa við gefin loforð og því kemur hvorki Gyökeres né Geovany Quenda í þessum mánuði.
Það gæti vel farið svo að hann fái fleiri en tvo leikmenn frá sínu gamla félagi í sumar en varnarmaðurinn Goncalo Inacio er einnig sagður ofarlega á lista portúgalska stjórans.
Athugasemdir
