PSG gerði markalaust jafntefli gegn Reims í frönsku deildinni í kvöld.
Liðið er þó enn með þriggja stiga forystu á toppi deildarinnar en Lorient gæti minnkað forskotið niður í eitt stig með sigri á Brest á morgun.
Það dró til tíðinda undir lok fyrri hálfleiks í leik Reims og PSG þegar Sergio Ramos var rekinn af velli. Marco Verratti var dæmdur brotlegur og Ramos mótmælti þeim dómi og fékk gult spjald fyrir.
Hann hætti ekki að mótmæla og uppskar að lokum rautt spjald.
Ramos þekkir það vel að fá brottvísun en þetta var brottvísun númer 28 á ferlinum hjá þessum 36 ára gamla spænska varnarmanni.
Athugasemdir
