Gylfi Þór Sigurðsson er mættur til móts við lið Vals í Montecastillo á Spáni þar sem liðið er við æfingar næstu vikuna. Gylfi sem er 34 ára er án liðs en hann lék síðast með Lyngby í Danmörku.
Gylfi hefur verið orðaður við heimkomu og þá helst við Valsmenn sem hafa líst því ítrekað yfir að þeir ætli sér að ná í þann stóra á ný.
Valsmenn hafa síðustu tvö ár verið að sækja yngri leikmenn en oft áður í bland við reynslumikla leikmenn. Þeir hafa t.a.m endursamið við bæði Aron Jóhannsson og Birki Má Sævarsson nýlega. Ljóst er að töluverð reynsla og gæði munu koma inn í liðið semji Valsmenn við Gylfa sem hentar vel inn í þann leikstíl sem Arnar Grétarsson vill spila.
Samkvæmt heimildum fótbolta.net horfa Valsmenn björtum augum á framhaldið með byggingu knattspyrnuhúss og nýlega samninga við Reykjavíkurborg sem tryggja félaginu umtalsverðar fjárhæðir á næstu árum.
Það er stórt ár framundan hjá bæði karla- og kvennaliði Vals en bæði lið taka þátt í evrópukeppni og munu tefla fram sterkum liðum.
Björn Steinar Jónsson formaður meistaraflokksráðs Vals staðfesti í samtali við fótbolta.net að Gylfi væri mættur til æfinga eftir langt ferðalag en vildi að öðru leyti ekki tjá sig um málið.
