Sara Björk Gunnarsdóttir var á sínum stað í byrjunarliði Al-Qadsiah sem tók á móti Al-Ittihad í efstu deild í Sádi-Arabíu í dag.
Liðin mættust í spennandi slag í efri hluta deildarinnar en heimakonur í liði Al-Qadsiah voru betri og skópu 4-1 sigur, þar sem Ajara Nchout sá um markaskorunina.
Ajara Nchout skoraði fernu til að tryggja þennan sigur og er Al-Qadsiah í þriðja sæti eftir þennan sigur, með 18 stig eftir 10 umferðir. Al-Ittihad er með 15 stig.
Alexandra Jóhannsdóttir kom þá við sögu í 2-0 tapi Fiorentina á útivelli gegn Como í efstu deild á Ítalíu.
Fiorentina var sterkari aðilinn stærsta hluta leiksins en tókst ekki að skora mark og niðurstaðan svekkjandi tap. Þetta er annað tap liðsins í röð í deildinni, en sigur í dag hefði skotið Alexöndru og stöllum upp í annað sætið.
Kristófer Jónsson var að lokum í byrjunarliði Triestina sem vann góðan sigur á útivelli gegn Caldiero Terme í C-deild ítalska boltans.
Kristófer spilaði fyrstu 70 mínútur leiksins og var þetta hans tólfti deildarleikur á tímabilinu, en Triestina er í fallbaráttu C-deildarinnar með 19 stig eftir 22 umferðir.
Liðið var á botni deildarinnar en er núna búið að sigra fjóra af síðustu fimm deildarleikjum sínum í tilraun til að forðast fall.
Al-Qadsiah 4 - 1 Al-Ittihad
Como 2 - 0 Fiorentina
Caldiero Terme 0 - 2 Triestina
Athugasemdir
