Ísland hefur þá skorað sex mörk gegn 66 leikjum Þýskalands.

En það er þessi eini leikur sem leyfir manni að dreyma. Leikurinn í Wiesbaden í októbermánuði árið 2017. Sá leikur endaði með mögnuðum 2-3 sigri Íslendinga og er hann góð áminning um að Ísland geti unnið Þýskaland ef nánast allt gengur upp.

Það er svo sannarlega einn fræknasti sigur sem íslenskt landslið hefur unnið frá upphafi. Það var fyrsta tap Þýskalands í undankeppni í næstum því 20 ár.

„Ég held að það séu ekki margir í Þýskalandi eða Bayern sem búast við því (að Íslandi taki stig eða sigur á eftir). Það væri ótrúlega skemmtilegt," sagði Glódís Perla Viggósdóttir í samtali við Fótbolta.net í gær en hún er fyrirliði Bayern og þekkir þýska liðið vel. Hún er þá ein af þremur sem voru hluti af hópnum árið 2017 en hinar tvær eru Ingibjörg Sigurðardóttir og Sandra María Jessen.

„Ég held að ég muni aldrei gleyma þeim leik. Þetta var eitt það skemmtilegasta sem ég hef gert með landsliðinu. Þessi sigur var ekki eitthvað sem við eða einhver annar í heiminum bjóst við. Það gefur okkur ákveðna trú á því að við getum unnið Þýskaland," sagði Glódís við Fótbolta.net í september síðastliðnum.

Síðustu þrír leikir gegn Þýskalandi hafa ekki verið góðir, en núna eru nýir tímar og nýjar stjörnur hafa fæðst. Það er kominn tími á að sjokkera Evrópu á nýjan leik og það er alveg hægt ef okkar stelpur eiga sinn besta leik. Þróunin á liðinu hefur verið nokkuð góð í síðustu leikjum og vonandi heldur það áfram í dag.