Josh Acheampong í leiknum gegn Legia í kvöld
Enzo Maresca, stjóri Chelsea, sparaði ekki hrósið þegar hann talaði um Josh Acheampong eftir 3-0 sigurinn á Legia Varsjá í Sambandsdeildinni í kvöld.
Ítalinn talaði um ungu leikmennina eftir leik og byrjaði á að ræða frammistöðu hins 17 ára gamla Tyrique George sem skoraði sitt fyrsta mark fyrir félagið snemma í síðari hálfleiknum.
„Í fyrsta lagi er ég ánægður fyrir hönd unglingastarfsins því hann kemur þaðan og ég er auðvitað líka ánægður fyrir hans hönd. Hann var frekar góður í fyrri hálfleiknum, tók ábyrgð og í seinni hálfleik var hann enn betri,“ sagði Maresca, sem lýsti síðan yfir ást sinni á Acheampong, sem hefur tekist að sanna sig í öllum þeim stöðum sem hann hefur spilað fyrir félagið.
„Josh Acheampong er sá sem ég varð ástfanginn af í kvöld því fyrir mér getur hann orðið stórkostlegur leikmaður fyrir félagið og fótboltann í heild sinni.
„Góður leikmaður sýnir þér að hann geti spilað mismunandi stöður og gerir vel hvar sem honum er spilað. Hann var góður í bakverði, miðju og miðverði þannig þetta snýst ekki um að spila þessa eða einhverja aðra stöðu. Ef þú ert góður leikmaður þá getur þú spilað í mörgum stöðum.“
„Ég varð ástfanginn af honum í kvöld, en í hreinskilni sagt hef ég verið það síðan tímabilið fór af stað. Hann sýndi að hann getur orðið ótrúlega góður fyrir félagið,“ sagði stjórinn við blaðamenn.
Athugasemdir
