Lionel Messi leiddi magnaðan endurkomusigur Inter Miami gegn Los Angeles FC í 8-liða úrslitum Meistaradeildar Norður-Ameríku í nótt.

Messi og félagar töpuðu fyrri leiknum í Los Angeles og lentu svo undir snemma leiks á heimavelli. Þeir þurftu því að klífa bratta brekku en Lionel Messi er ekki þekktur fyrir að gefast upp.

Hann kom boltanum í netið á 31. mínútu en ekki dæmt mark eftir athugun í VAR-herberginu. Skömmu síðar skoraði hann þó löglegt mark og staðan orðin 1-1, eða 1-2 í einvíginu í heild.

Leikurinn var opinn en heimamenn í Inter fengu betri færi og var Messi í aðalhlutverki. Hann lagði upp fyrir Noah Allen á 61. mínútu og skoraði svo úr vítaspyrnu til að tryggja magnaðan endurkomusigur.

Lokatölur 3-1 fyrir Inter og því 3-2 í einvíginu eftir að hafa verið tveimur mörkum undir.

Luis Suárez var í byrjunarliði Inter og setti boltann í netið á 67. mínútu en markið ekki dæmt gilt eftir athugun í VAR.

Inter mætir annað hvort Vancouver Whitecaps eða Pumas í undanúrslitum. Cruz Azul og Tigres eigast við í hinum undanúrslitaleiknum.

Til gamans má geta að Cengiz Ünder var í byrjunarliði Los Angeles og kom Olivier Giroud inn af bekknum.

Steven Cherundolo, fyrrum leikmaður Hannover, er þjálfari Los Angeles á meðan Javier Mascherano situr við stjórnvölinn hjá Inter.

Jordi Alba var í byrjunarliði Inter, sem er með Oscar Ustari fyrrum varamarkvörð Argentínu á milli stanganna, en Sergio Busquets var ekki í hóp.

Inter Miami [1]-1 LAFC - Messi 35'
byu/MUFColin insoccer