Sævar Atli Magnússon skoraði sitt fyrsta mark á árinu 2025 þegar Lyngby gerði 2-2 jafntefli gegn Álaborg í neðri hlutanum í dönsku deildinni í kvöld.
Álaborg komst yfir með marki úr vítaspyrnu en Sævar jafnaði metin þegar hann skallaði boltann í netið eftir fyrirgjöf. Þetta var fyrsta mark Sævars síðan 10. nóvember en þá skoraði hann einmitt í 2-2 jafntefli gegn Álaborg.
Álaborg var 2-1 yfir í hálfleik en jöfnunarmark Lyngby kom þegar tíu mínútur voru til loka venjulegs leiktíma.
Marcel Römer, sem er á leið til KA samkvæmt heimildum Fótbolta.net, sat allan tímann á bekknum hjá Lyngby. Nóel Atli Arnórsson sat á bekknum hjá Álaborg en hann hefur verið utan hóps í síðustu þremur leikjum vegna meiðsla.
Lyngby er í ellefta og næst neðsta sæti deildarinnar með 19 stig, stigi á eftir Sönderjyske en það er næsti andstæðingur liðsins. Álaborg er í 9. sæti með 23 stig.
Athugasemdir
