Bandaríkin og Wales skildu jöfn, 1-1, í fyrstu umferð heimsmeistaramótsins.
Bandaríkin voru betri í fyrri hálfleik og tóku verðskuldaða forystu en Walesverjar voru sterkari eftir leikhlé og verðskulduðu jöfnunarmarkið sem Gareth Bale skoraði úr vítaspyrnu á 82. mínútu.
Níu mínútum var bætt við leiktímann og þegar komið var á 100. mínútu leiksins komust Walesverjar í skyndisókn.
Matt Turner, markvörður bandaríska landsliðsins sem er samningsbundinn Arsenal, neyddist til að hlaupa út úr eigin vítateig til að hreinsa í burtu en boltinn barst til Bale sem var við miðjulínuna og mundaði skotfótinn.
Bale ætlaði að skjóta í autt markið á meðan Turner spretti til baka, en honum tókst ekki ætlunarverk sitt vegna brots frá Kellyn Acosta. Acosta var fljótur að hugsa og náði að brjóta á Bale áður en hann hleypti skotinu af og fékk gult spjald að launum.
Einhverjir vildu sjá Acosta fjúka útaf fyrir að ræna upplögðu marktækifæri en það má deila lengi um.
