Venezia, sem er nýliði í deildinni, hefur gengið erfiðlega að koma sér á skrið í deildinni.

Liðið varð fyrir þvílíkri blóðtöku þegar serbneski markvörðurinn Filip Stankovic meiddist. Hann hefur verið einn af bestu mönnum Venezia á tímabilinu og hafði það veruleg áhrif á gestina að missa hann.

Liðið lenti 2-0 undir gegn Udinese í byrjun síðari hálfleiks. Eusebio Di Francesco, þjálfari Venezia, gerði þrjár breytingar um miðjan síðari hálfleikinn, þar sem Mikael Egill Ellertsson kom meðal annars inn á, og eftir það tókst Venezia að snúa við blaðinu.

Hans Nicolussi og Christian Gytkjær jöfnuðu metin á fimmtán mínútna kafla, en stuttu síðar drap Iker Bravo vonir Venezia með góðu marki eftir stoðsendingu frá Oumar Solet.

Bjarki Steinn Bjarkason kom inn af bekknum á 87. mínútu til að reyna hjálpa Venezia að sækja jöfnunarmark en það kom aldrei og lokatölur því 3-2 Udinese í vil.

Venezia er í næst neðsta sæti með 16 stig en Udinese í 10. sæti með 29 stig.

Verona vann þá botnlið Monza, 1-0, með sjálfsmarki Stefan Lekovic á 13. mínútu.

Monza er með 13 stig en Verona í 13. sæti með 23 stig, þremur stigum fyrir ofan fallsæti.

Óttar Magnús Karlsson var þá í byrjunarliði Spal sem tapaði fyrir U23 ára liði AC Milan, 2-1, í C-deildinni. Spal er í 16. sæti B-riðils með 24 stig.

Monza 0 - 1 Verona
0-1 Stefan Lekovic ('13 , sjálfsmark)

Udinese 3 - 2 Venezia
1-0 Lorenzo Lucca ('47 )
2-0 Sandi Lovric ('52 )
2-1 Hans Nicolussi ('64 )
2-2 Christian Gytkjaer ('79 )
3-2 Iker Bravo ('84 )