Aston Villa er að ganga frá viðræðum við Manchester United um að fá enska sóknarmanninn Marcus Rashford á láni út tímabilið en Sky Sports og Fabrizio Romano segja þetta í dag.
Sky segir að Villa greiði 75 prósent af launum Rashford hjá United.
Möguleiki er á að það hækki upp í 90 prósent en það veltur allt á frammistöðu Rashford og Villa.
Fabrizio Romano segir þá að kaupákvæðið í samningum nemi um 40 milljónum punda. Romano hefur þá fullyrt skiptin með frasanum „Here we go!“ .
Rashford, sem er 27 ára gamall, hefur sjálfur samþykkt að ganga í raðir Villa og samkvæmt ensku miðlunum átti hann gott samtal með Unai Emery, stjóra félagsins. Hann mun gangast undir læknisskoðun síðar í dag og í kjölfarið skrifa undir hjá Villa.
Svipaður strúktur er á þessu láni og þegar United lánaði Jadon Sancho til Borussia Dortmund á síðasta tímabili og Antony til Real Betis í þessum mánuði.
Englendingurinn hefur ekkert komið við sögu með United síðasta mánuðinn. Ruben Amorim, stjóri United, sagðist setja sömu kröfur á alla leikmenn og að Rashford væri ekki að gera nóg til að uppfylla þær kröfur.
Á þessu tímabili hefur Rashford skorað 7 mörk og gefið 3 stoðsendingar í öllum keppnum með United.
Athugasemdir
