West Ham United hefur náð samkomulagi við Brighton um írska framherjann Evan Ferguson en hann gengur í raðir félagsins á láni út tímabilið.
Írinn skaust fram á sjónarsviðið tímabilið 2022-2023 þá aðeins 18 ára gamall.
Hann skoraði 10 mörk í öllum keppnum og var valinn besti ungi leikmaður Brighton það tímabilið.
Ferguson byrjaði síðasta tímabil með látum. Hann skoraði fyrstu þrennuna í leik gegn Newcastle í byrjun september og komst þar í fámennan hóp en hann var aðeins fjórði leikmaðurinn til þess að ná því á 18 ára aldri.
Erfið hnémeiðsli í apríl héldu honum frá keppni næstu mánuði á eftir og hefur hann ekki alveg náð að taka upp þráðinn frá þar sem frá var horfið.
Framherjinn hefur að mestu verið varamaður á leiktíðinni og aðeins skorað eitt mark, en fær nú tækifæri til þess að koma ferlinum aftur af stað.
West Ham hefur náð samkomulagi við Brighton um að fá Ferguson á láni út tímabilið, en þar hittir hann Graham Potter, fyrrum stjóra sinn hjá Brighton.
Chelsea, Everton og Tottenham höfðu öll áhuga á að fá Ferguson, en það heillaði framherjann meira að endurnýja kynni sín við Potter.
Bayer Leverkusen reyndi þá að fá Ferguson á dögunum til að koma í stað Victor Boniface. Al Nassr var í viðræðum við Boniface en valdi í staðinn að taka Jhon Duran frá Aston Villa og fór því svo að Boniface hélt kyrru fyrir hjá Leverkusen.
Athugasemdir
